1The `title of the hundrid and seuene and thrittithe salm. `To Dauith him silf. Lord, Y schal knouleche to thee in al myn herte; for thou herdist the wordis of my mouth. Mi God, Y schal singe to thee in the siyt of aungels;

stylus

2Y schal worschipe to thin hooli temple, and Y schal knouleche to thi name. On thi merci and thi treuthe; for thou hast magnefied thin hooli name aboue al thing.

stylus

3In what euere dai Y schal inwardli clepe thee, here thou me; thou schalt multipli vertu in my soule.

stylus

4Lord, alle the kingis of erthe knouleche to thee; for thei herden alle the wordis of thi mouth.

stylus

5And singe thei in the weies of the Lord; for the glorie of the Lord is greet.

stylus

6For the Lord is hiy, and biholdith meke thingis; and knowith afer hiy thingis.

stylus

7If Y schal go in the myddil of tribulacioun, thou schalt quikene me; and thou stretchidist forth thin hond on the ire of myn enemyes, and thi riyt hond made me saaf.

stylus

8The Lord schal yelde for me, Lord, thi merci is with outen ende; dispise thou not the werkis of thin hondis.

stylus