1The titil of the hundrid and seuententhe salm. Alleluia. Knouleche ye to the Lord, for he is good; for his merci is with outen ende.

stylus

2Israel seie now, for he is good; for his merci is with outen ende.

stylus

3The hous of Aaron seie now; for his merci is with outen ende.

stylus

4Thei that dreden the Lord, seie now; for his merci is withouten ende.

stylus

5Of tribulacioun Y inwardli clepide the Lord; and the Lord herde me in largenesse.

stylus

6The Lord is an helpere to me; Y schal not drede what a man schal do to me.

stylus

7The Lord is an helpere to me; and Y schal dispise myn enemyes.

stylus

8It is betere for to trist in the Lord; than for to triste in man.

stylus

9It is betere for to hope in the Lord; than for to hope in princes.

stylus

10Alle folkis cumpassiden me; and in the name of the Lord it bifelde, for Y am auengide on hem.

stylus

11Thei cumpassinge cumpassiden me; and in the name of the Lord, for Y am auengid on hem.

stylus

12Thei cumpassiden me as been, and thei brenten out as fier doith among thornes; and in the name of the Lord, for Y am avengid on hem.

stylus

13I was hurlid, and turnede vpsedoun, that Y schulde falle doun; and the Lord took me vp.

stylus

14The Lord is my strengthe, and my heryyng; and he is maad to me in to heelthe.

stylus

15The vois of ful out ioiyng and of heelthe; be in the tabernaclis of iust men.

stylus

16The riyt hond of the Lord hath do vertu, the riyt hond of the Lord enhaunside me; the riyt hond of the Lord hath do vertu.

stylus

17I schal not die, but Y schal lyue; and Y schal telle the werkis of the Lord.

stylus

18The Lord chastisinge hath chastisid me; and he yaf not me to deth.

stylus

19Opene ye to me the yatis of riytfulnesse, and Y schal entre bi tho, and Y schal knouleche to the Lord;

stylus

20this yate is of the Lord, and iust men schulen entre bi it.

stylus

21I schal knouleche to thee, for thou herdist me; and art maad to me in to heelthe.

stylus

22The stoon which the bilderis repreueden; this is maad in to the heed of the corner.

stylus

23This thing is maad of the Lord; and it is wonderful bifore oure iyen.

stylus

24This is the dai which the Lord made; make we ful out ioye, and be we glad ther ynne.

stylus

25O! Lord, make thou me saaf, O! Lord, make thou wel prosperite;

stylus

26blessid is he that cometh in the name of the Lord. We blesseden you of the hous of the Lord;

stylus

27God is Lord, and hath youe liyt to vs. Ordeyne ye a solempne dai in thicke puplis; til to the horn of the auter.

stylus

28Thou art my God, and Y schal knouleche to thee; thou art my God, and Y schal enhaunse thee. I schal knouleche to thee, for thou herdist me; and thou art maad to me in to heelthe.

stylus

29Knouleche ye to the Lord, for he is good; for his merci is with outen ende.

stylus