1The title of the hundrid and fourthe salm. Alleluya. Knouleche ye to the Lord, and inwardli clepe ye his name; telle ye hise werkis among hethen men.

stylus

2Synge ye to hym, and seie ye salm to him, and telle ye alle hise merueylis;

stylus

3be ye preisid in his hooli name. The herte of men sekynge the Lord be glad;

stylus

4seke ye the Lord, and be ye confermed; seke ye euere his face.

stylus

5Haue ye mynde on hise merueilis, whiche he dide; on his grete wondris, and domes of his mouth.

stylus

6The seed of Abraham, his seruaunt; the sones of Jacob, his chosun man.

stylus

7He is oure Lord God; hise domes ben in al the erthe.

stylus

8He was myndeful of his testament in to the world; of the word which he comaundide in to a thousynde generaciouns.

stylus

9Which he disposide to Abraham; and of his ooth to Isaac.

stylus

10And he ordeynede it to Jacob in to a comaundement; and to Israel in to euerlastinge testament.

stylus

11And he seide, I shal yiue to thee the lond of Canaan; the cord of youre eritage.

stylus

12Whanne thei weren in a litil noumbre; and the comelingis of hem weren ful fewe.

stylus

13And thei passiden fro folk in to folk; and fro a rewme in to another puple.

stylus

14He lefte not a man to anoye hem; and he chastiside kyngis for hem.

stylus

15Nile ye touche my cristis; and nyle ye do wickidli among my prophetis.

stylus

16And God clepide hungir on erthe; and he wastide al the stidefastnesse of breed.

stylus

17He sente a man bifore hem; Joseph was seeld in to a seruaunt.

stylus

18Thei maden lowe hise feet in stockis, irun passide by his soule; til the word of him cam.

stylus

19The speche of the Lord enflawmede him;

stylus

20the king sente and vnbond hym; the prince of puplis sente and delyuerede him.

stylus

21He ordeynede him the lord of his hous; and the prince of al his possessioun.

stylus

22That he schulde lerne hise princis as him silf; and that he schulde teche hise elde men prudence.

stylus

23And Israel entride in to Egipt; and Jacob was a comeling in the lond of Cham.

stylus

24And God encreesside his puple greetli; and made hym stidefast on hise enemyes.

stylus

25He turnede the herte of hem, that thei hatiden his puple; and diden gile ayens hise seruauntis.

stylus

26He sent Moises, his seruaunt; thilke Aaron, whom he chees.

stylus

27He puttide in hem the wordis of hise myraclis; and of hise grete wondris in the lond of Cham.

stylus

28He sente derknessis, and made derk; and he made not bitter hise wordis.

stylus

29He turnede the watris of hem in to blood; and he killide the fischis of hem.

stylus

30And the lond of hem yaf paddoks; in the priue places of the kyngis of hem.

stylus

31God seide, and a fleische flie cam; and gnattis in alle the coostis of hem.

stylus

32He settide her reynes hail; fier brennynge in the lond of hem.

stylus

33And he smoot the vynes of hem, and the fige trees of hem; and al to-brak the tree of the coostis of hem.

stylus

34He seide, and a locuste cam; and a bruk of which was noon noumbre.

stylus

35And it eet al the hey in the lond of hem; and it eet al the fruyt of the lond of hem.

stylus

36And he killide ech the firste gendrid thing in the lond of hem; the firste fruitis of alle the trauel of hem.

stylus

37And he ledde out hem with siluer and gold; and noon was sijk in the lynagis of hem.

stylus

38Egipt was glad in the goyng forth of hem; for the drede of hem lai on Egipcians.

stylus

39He spredde abrood a cloude, in to the hiling of hem; and fier, that it schynede to hem bi nyyt.

stylus

40Thei axiden, and a curlew cam; and he fillide hem with the breed of heuene.

stylus

41He brak a stoon, and watris flowiden; floodis yeden forth in the drye place.

stylus

42For he was myndeful of his hooli word; which he hadde to Abraham, his child.

stylus

43And he ledde out his puple in ful out ioiyng; and hise chosun men in gladnesse.

stylus

44And he yaf to hem the cuntreis of hethen men; and thei hadden in possessioun the trauels of puplis.

stylus

45That thei kepe hise iustifiyngis; and seke his lawe.

stylus