1Forsothe these thre men leften of to answere Joob, for he semyde a iust man to hem.

stylus

2And Helyu, the sone of Barachel Buzites, of the kynrede of Ram, was wrooth, and hadde indignacioun; forsothe he was wrooth ayens Joob, for he seide hym silf to be iust bifor God.

stylus

3Sotheli Helyu hadde indignacioun ayens the thre frendis of hym, for thei hadden not founde resonable answere, but oneli hadde condempned Joob.

stylus

4Therfor Helyu abood Joob spekynge, for thei, that spaken, weren eldere men.

stylus

5But whanne he hadde seyn, that thre men myyten not answere, he was wrooth greetly.

stylus

6And Helyu, the sone of Barachel Buzites, answeride, and seyde, Y am yongere in tyme, sotheli ye ben eldere; therfor with heed holdun doun Y dredde to schewe to you my sentence.

stylus

7For Y hopide that lengere age schulde speke, and that the multitude of yeeris schulden teche wisdom.

stylus

8But as Y se, spirit is in men, and the enspiryng `ether reuelacioun, of Almyyti God yyueth vndurstondyng.

stylus

9Men of long lijf ben not wise, and elde men vndurstonden not doom.

stylus

10Therfor Y schal seie, Here ye me, and Y also schal schewe my kunnyng to you.

stylus

11For Y abood youre wordis, Y herde youre prudence, as long as ye dispuytiden in youre wordis.

stylus

12And as long as Y gesside you to seie ony thing, Y bihelde; but as Y se, `noon is of you, that may repreue Joob, and answere to hise wordis;

stylus

13lest perauenture ye seien, We han founde wisdom; God, and not man, hath cast hym awei.

stylus

14Joob spak no thing to me, and Y not bi youre wordis schal answere hym.

stylus

15Thei dredden, and answeriden no more, and token awei speche fro hem silf.

stylus

16Therfor for Y abood, and thei spaken not, thei stoden, and answeriden no more; also Y schal answere my part,

stylus

17and Y schal schewe my kunnyng.

stylus

18For Y am ful of wordis, and the spirit of my wombe, `that is, mynde, constreyneth me.

stylus

19Lo! my wombe is as must with out `spigot, ether a ventyng, that brekith newe vessels.

stylus

20Y schal speke, and brethe ayen a litil; Y schal opene my lippis, and Y schal answere.

stylus

21Y schal not take the persoone of man, and Y schal not make God euene to man.

stylus

22For Y woot not hou long Y schal abide, and if my Makere take me awei `after a litil tyme.

stylus