1Forsothe Sophar Naamathites answeride, and seide,

stylus

2Therfor my thouytis dyuerse comen oon aftir anothir; and the mynde is rauyischid in to dyuerse thingis.

stylus

3Y schal here the techyng, bi which thou repreuest me; and the spirit of myn vndurstondyng schal answere me.

stylus

4Y woot this fro the bigynnyng, sithen man was set on erthe,

stylus

5that the preisyng of wickid men is schort, and the ioie of an ypocrite is at the licnesse of a poynt.

stylus

6Thouy his pride `stieth in to heuene, and his heed touchith the cloudis,

stylus

7he schal be lost in the ende, as a dunghil; and, thei that sien hym, schulen seie, Where is he?

stylus

8As a dreem fleynge awei he schal not be foundun; he schal passe as `a nyytis siyt.

stylus

9The iye that siy hym schal not se; and his place schal no more biholde him.

stylus

10Hise sones schulen be `al to-brokun with nedynesse; and hise hondis schulen yelde to hym his sorewe.

stylus

11Hise boonys schulen be fillid with the vices of his yong wexynge age; and schulen slepe with hym in dust.

stylus

12For whanne yuel was swete in his mouth, he hidde it vndur his tunge.

stylus

13He schal spare it, and schal not forsake it; and schal hide in his throte.

stylus

14His breed in his wombe schal be turned in to galle of snakis withynne.

stylus

15He schal spue out the richessis, whiche he deuouride; and God schal drawe tho ritchessis out of his wombe.

stylus

16He schal souke the heed of snakis; and the tunge of an addre schal sle hym.

stylus

17Se he not the stremys of the flood of the stronde, of hony, and of botere.

stylus

18He schal suffre peyne for alle thingis whiche he hath do, netheles he schal not be wastid; aftir the multitude of his fyndyngis, so and `he schal suffre.

stylus

19For he brake, and made nakid the hows of a pore man; he rauyschide, and bildide it not.

stylus

20And his wombe was not fillid; and whanne he hath that, that he couetide, he may not holde in possessioun.

stylus

21`No thing lefte of his mete; and therfor no thing schal dwelle of his goodis.

stylus

22Whanne he is fillid, he schal be maad streit; he schal `be hoot, and alle sorewe schal falle in on hym.

stylus

23`Y wolde, that his wombe be fillid, that he sende out in to hym the ire of his strong veniaunce, and reyne his batel on hym.

stylus

24He schal fle yrun armuris, and he schal falle in to a brasun boowe.

stylus

25Led out, and goynge out `of his schethe, and schynynge, `ether smytinge with leit, `in to his bittirnesse; orrible fendis schulen go, and schulen come on hym.

stylus

26Alle derknessis ben hid in hise priuytees; fier, which is not teendid, schal deuoure hym; he schal be turmentid left in his tabernacle.

stylus

27Heuenes schulen schewe his wickidnesse; and erthe schal rise togidere ayens hym.

stylus

28The seed of his hows schal be opyn; it schal be drawun doun in the dai of the strong veniaunce of the Lord.

stylus

29This is the part of a wickid man, `which part is youun of God, and the eritage of hise wordis of the Lord.

stylus