1The charite of britherhod dwelle in you, and nyle ye foryete hospitalite;

stylus

2for bi this summen plesiden to aungels, that weren resseyued to herborewe.

stylus

3Thenke ye on boundun men, as ye weren togidere boundun, and of trauelinge men, as ye silf dwellinge in the body.

stylus

4`Wedding is in alle thingis onourable, and bed vnwemmed; for God schal deme fornicatouris and auouteris.

stylus

5Be youre maneres withoute coueitise, apaied with present thingis; for he seide, Y schal not leeue thee,

stylus

6nether forsake, so that we seie tristily, The Lord is an helpere to me; Y schal not drede, what a man schal do to me.

stylus

7Haue ye mynde of youre souereyns, that han spokun to you the word of God; of whiche `biholde ye the goyng out of lyuynge, and sue ye the feith of hem,

stylus

8Jhesu Crist, yistirdai, and to dai, he is also into worldis.

stylus

9Nyle ye be led awei with dyuerse `techingis, and straunge. For it is best to stable the herte with grace, not with metis, whiche profitiden not to men wandringe in hem.

stylus

10We han an auter, of which thei that seruen to the tabernacle, han not power to ete.

stylus

11For of whiche beestis the blood is borun in for synne in to hooli thingis bi the bischop, the bodies of hem ben brent with out the castels.

stylus

12For which thing Jhesu, that he schulde halewe the puple bi his blood, suffride with out the gate.

stylus

13Therfor go we out to hym with out the castels, berynge his repreef.

stylus

14For we han not here a citee dwellynge, but we seken a citee to comynge.

stylus

15Therfor bi hym offre we a sacrifice of heriyng euere more to God, that is to seye, the fruyt of lippis knoulechinge to his name.

stylus

16And nyle ye foryete wel doynge, and comynyng; for bi siche sacrifices God is disserued.

stylus

17Obeie ye to youre souereyns, and be ye suget to hem; for thei perfitli waken, as to yeldinge resoun for youre soulis, that thei do this thing with ioie, and not sorewinge; for this thing spedith not to you.

stylus

18Preie ye for vs, and we tristen that we han good conscience in alle thingis, willynge to lyue wel.

stylus

19More ouer Y biseche you to do, that Y be restorid the sunnere to you.

stylus

20And God of pees, that ladde out fro deth the greet scheepherd of scheep, in the blood of euerlastinge testament, oure Lord Jhesu Crist,

stylus

21schape you in al good thing, that ye do the wille of hym; and he do in you that thing that schal plese bifor hym, bi Jhesu Crist, to whom be glorie in to worldis of worldis. Amen.

stylus

22And, britheren, Y preie you, that ye suffre a word of solace; for bi ful fewe thingis Y haue writun to you.

stylus

23Knowe ye oure brother Tymothe, that is sent forth, with whom if he schal come more hastili, Y schal se you.

stylus

24Grete ye wel alle youre souereyns, and alle hooli men. The britheren of Italie greten you wel.

stylus

25The grace of God be with you alle. Amen.

stylus