Matthaeus 9

¹et ascendens in naviculam transfretavit et venit in civitatem suam

²et ecce offerebant ei paralyticum iacentem in lecto et videns Iesus fidem illorum dixit paralytico confide fili remittuntur tibi peccata tua

³et ecce quidam de scribis dixerunt intra se hic blasphemat

⁴et cum vidisset Iesus cogitationes eorum dixit ut quid cogitatis mala in cordibus vestris

⁵quid est facilius dicere dimittuntur tibi peccata aut dicere surge et ambula

⁶ut sciatis autem quoniam Filius hominis habet potestatem in terra dimittendi peccata tunc ait paralytico surge tolle lectum tuum et vade in domum tuam

⁷et surrexit et abiit in domum suam

⁸videntes autem turbae timuerunt et glorificaverunt Deum qui dedit potestatem talem hominibus

⁹et cum transiret inde Iesus vidit hominem sedentem in teloneo Mattheum nomine et ait illi sequere me et surgens secutus est eum

¹⁰et factum est discumbente eo in domo ecce multi publicani et peccatores venientes discumbebant cum Iesu et discipulis eius

¹¹et videntes Pharisaei dicebant discipulis eius quare cum publicanis et peccatoribus manducat magister vester

¹²at Iesus audiens ait non est opus valentibus medico sed male habentibus

¹³euntes autem discite quid est misericordiam volo et non sacrificium non enim veni vocare iustos sed peccatores

¹⁴tunc accesserunt ad eum discipuli Iohannis dicentes quare nos et Pharisaei ieiunamus frequenter discipuli autem tui non ieiunant

¹⁵et ait illis Iesus numquid possunt filii sponsi lugere quamdiu cum illis est sponsus venient autem dies cum auferetur ab eis sponsus et tunc ieiunabunt

¹⁶nemo autem inmittit commissuram panni rudis in vestimentum vetus tollit enim plenitudinem eius a vestimento et peior scissura fit

¹⁷neque mittunt vinum novum in utres veteres alioquin rumpuntur utres et vinum effunditur et utres pereunt sed vinum novum in utres novos mittunt et ambo conservantur

¹⁸haec illo loquente ad eos ecce princeps unus accessit et adorabat eum dicens filia mea modo defuncta est sed veni inpone manum super eam et vivet

¹⁹et surgens Iesus sequebatur eum et discipuli eius

²⁰et ecce mulier quae sanguinis fluxum patiebatur duodecim annis accessit retro et tetigit fimbriam vestimenti eius

²¹dicebat enim intra se si tetigero tantum vestimentum eius salva ero

²²at Iesus conversus et videns eam dixit confide filia fides tua te salvam fecit et salva facta est mulier ex illa hora

²³et cum venisset Iesus in domum principis et vidisset tibicines et turbam tumultuantem

²⁴dicebat recedite non est enim mortua puella sed dormit et deridebant eum

²⁵et cum eiecta esset turba intravit et tenuit manum eius et surrexit puella

²⁶et exiit fama haec in universam terram illam

²⁷et transeunte inde Iesu secuti sunt eum duo caeci clamantes et dicentes miserere nostri Fili David

²⁸cum autem venisset domum accesserunt ad eum caeci et dicit eis Iesus creditis quia possum hoc facere vobis dicunt ei utique Domine

²⁹tunc tetigit oculos eorum dicens secundum fidem vestram fiat vobis

³⁰et aperti sunt oculi illorum et comminatus est illis Iesus dicens videte ne quis sciat

³¹illi autem exeuntes diffamaverunt eum in tota terra illa

³²egressis autem illis ecce obtulerunt ei hominem mutum daemonium habentem

³³et eiecto daemone locutus est mutus et miratae sunt turbae dicentes numquam paruit sic in Israhel

³⁴Pharisaei autem dicebant in principe daemoniorum eicit daemones

³⁵et circumibat Iesus civitates omnes et castella docens in synagogis eorum et praedicans evangelium regni et curans omnem languorem et omnem infirmitatem

³⁶videns autem turbas misertus est eis quia erant vexati et iacentes sicut oves non habentes pastorem

³⁷tunc dicit discipulis suis messis quidem multa operarii autem pauci

³⁸rogate ergo dominum messis ut eiciat operarios in messem suam

Matthaeus 9

¹Et ascendens in naviculam, transfretavit, et venit in civitatem suam.

²Et ecce offerebant ei paralyticum jacentem in lecto. Et videns Jesus fidem illorum, dixit paralytico : Confide fili, remittuntur tibi peccata tua.

³Et ecce quidam de scribis dixerunt intra se : Hic blasphemat.

⁴Et cum vidisset Jesus cogitationes eorum, dixit : Ut quid cogitatis mala in cordibus vestris ?

⁵Quid est facilius dicere : Dimittuntur tibi peccata tua : an dicere : Surge, et ambula ?

⁶Ut autem sciatis, quia Filius hominis habet potestatem in terra dimittendi peccata, tunc ait paralytico : Surge, tolle lectum tuum, et vade in domum tuam.

⁷Et surrexit, et abiit in domum suam.

⁸Videntes autem turbæ timuerunt, et glorificaverunt Deum, qui dedit potestatem talem hominibus.

⁹Et, cum transiret inde Jesus, vidit hominem sedentem in telonio, Matthæum nomine. Et ait illi : Sequere me. Et surgens, secutus est eum.

¹⁰Et factum est, discumbente eo in domo, ecce multi publicani et peccatores venientes, discumbebant cum Jesu, et discipulis ejus.

¹¹Et videntes pharisæi, dicebant discipulis ejus : Quare cum publicanis et peccatoribus manducat magister vester ?

¹²At Jesus audiens, ait : Non est opus valentibus medicus, sed male habentibus.

¹³Euntes autem discite quid est : Misericordiam volo, et non sacrificium. Non enim veni vocare justos, sed peccatores.

¹⁴Tunc accesserunt ad eum discipuli Joannis, dicentes : Quare nos, et pharisæi, jejunamus frequenter : discipuli autem tui non jejunant ?

¹⁵Et ait illis Jesus : Numquid possunt filii sponsi lugere, quamdiu cum illis est sponsus ? Venient autem dies cum auferetur ab eis sponsus : et tunc jejunabunt.

¹⁶Nemo autem immittit commissuram panni rudis in vestimentum vetus : tollit enim plenitudinem ejus a vestimento, et pejor scissura fit.

¹⁷Neque mittunt vinum novum in utres veteres : alioquin rumpuntur utres, et vinum effunditur, et utres pereunt. Sed vinum novum in utres novos mittunt : et ambo conservantur.

¹⁸Hæc illo loquente ad eos, ecce princeps unus accessit, et adorabat eum, dicens : Domine, filia mea modo defuncta est : sed veni, impone manum tuam super eam, et vivet.

¹⁹Et surgens Jesus, sequebatur eum, et discipuli ejus.

²⁰Et ecce mulier, quæ sanguinis fluxum patiebatur duodecim annis, accessit retro, et tetigit fimbriam vestimenti ejus.

²¹Dicebat enim intra se : Si tetigero tantum vestimentum ejus, salva ero.

²²At Jesus conversus, et videns eam, dixit : Confide, filia, fides tua te salvam fecit. Et salva facta est mulier ex illa hora.

²³Et cum venisset Jesus in domum principis, et vidisset tibicines et turbam tumultuantem, dicebat :

²⁴Recedite : non est enim mortua puella, sed dormit. Et deridebant eum.

²⁵Et cum ejecta esset turba, intravit : et tenuit manum ejus, et surrexit puella.

²⁶Et exiit fama hæc in universam terram illam.

²⁷Et transeunte inde Jesu, secuti sunt eum duo cæci, clamantes, et dicentes : Miserere nostri, fili David.

²⁸Cum autem venisset domum, accesserunt ad eum cæci. Et dicit eis Jesus : Creditis quia hoc possum facere vobis ? Dicunt ei : Utique, Domine.

²⁹Tunc tetigit oculos eorum, dicens : Secundum fidem vestram, fiat vobis.

³⁰Et aperti sunt oculi eorum : et comminatus est illis Jesus, dicens : Videte ne quis sciat.

³¹Illi autem exeuntes, diffamaverunt eum in tota terra illa.

³²Egressis autem illis, ecce obtulerunt ei hominem mutum, dæmonium habentem.

³³Et ejecto dæmonio, locutus est mutus, et miratæ sunt turbæ, dicentes : Numquam apparuit sic in Israël.

³⁴Pharisæi autem dicebant : In principe dæmoniorum ejicit dæmones.

³⁵Et circuibat Jesus omnes civitates, et castella, docens in synagogis eorum, et prædicans Evangelium regni, et curans omnem languorem, et omnem infirmitatem.

³⁶Videns autem turbas, misertus est eis : quia erant vexati, et jacentes sicut oves non habentes pastorem.

³⁷Tunc dicit discipulis suis : Messis quidem multa, operarii autem pauci.

³⁸Rogate ergo Dominum messis, ut mittat operarios in messem suam.