III Ioannis 1 Comparatio: Vulgate vs Clementine Vulgate

III Ioannis 1

¹senior Gaio carissimo quem ego diligo in veritate

²carissime de omnibus orationem facio prospere te ingredi et valere sicut prospere agit anima tua

³gavisus sum valde venientibus fratribus et testimonium perhibentibus veritati tuae sicut tu in veritate ambulas

⁴maiorem horum non habeo gratiam quam ut audiam filios meos in veritate ambulantes

⁵carissime fideliter facis quicquid operaris in fratres et hoc in peregrinos

⁶qui testimonium reddiderunt caritati tuae in conspectu ecclesiae quos bene facies deducens digne Deo

⁷pro nomine enim profecti sunt nihil accipientes a gentibus

⁸nos ergo debemus suscipere huiusmodi ut cooperatores simus veritatis

⁹scripsissem forsitan ecclesiae sed is qui amat primatum gerere in eis Diotrepes non recipit nos

¹⁰propter hoc si venero commoneam eius opera quae facit verbis malignis garriens in nos et quasi non ei ista sufficiant nec ipse suscipit fratres et eos qui cupiunt prohibet et de ecclesia eicit

¹¹carissime noli imitari malum sed quod bonum est qui benefacit ex Deo est qui malefacit non vidit Deum

¹²Demetrio testimonium redditur ab omnibus et ab ipsa veritate et nos autem testimonium perhibemus et nosti quoniam testimonium nostrum verum est

¹³multa habui scribere tibi sed nolui per atramentum et calamum scribere tibi

¹⁴spero autem protinus te videre et os ad os loquemur pax tibi salutant te amici saluta amicos per nomen

¹⁵

III Ioannis 1

¹Senior Gajo carissimo, quem ego diligo in veritate.

²Carissime, de omnibus orationem facio prospere te ingredi, et valere sicut prospere agit anima tua.

³Gavisus sum valde venientibus fratribus, et testimonium perhibentibus veritati tuæ, sicut tu in veritate ambulas.

⁴Majorem horum non habeo gratiam, quam ut audiam filios meos in veritate ambulare.

⁵Carissime, fideliter facis quidquid operaris in fratres, et hoc in peregrinos,

⁶qui testimonium reddiderunt caritati tuæ in conspectu ecclesiæ : quos, benefaciens, deduces digne Deo.

⁷Pro nomine enim ejus profecti sunt, nihil accipientes a gentibus.

⁸Nos ergo debemus suscipere hujusmodi, ut cooperatores simus veritatis.

⁹Scripsissem forsitan ecclesiæ : sed is qui amat primatum gerere in eis, Diotrephes, non recipit nos :

¹⁰propter hoc si venero, commonebo ejus opera, quæ facit, verbis malignis garriens in nos : et quasi non ei ista sufficiant, neque ipse suscipit fratres : et eos qui suscipiunt, prohibet, et de ecclesia ejicit.

¹¹Carissime, noli imitari malum, sed quod bonum est. Qui benefacit, ex Deo est : qui malefacit, non vidit Deum.

¹²Demetrio testimonium redditur ab omnibus, et ab ipsa veritate, sed et nos testimonium perhibemus : et nosti quoniam testimonium nostrum verum est.

¹³Multa habui tibi scribere : sed nolui per atramentum et calamum scribere tibi.

¹⁴Spero autem protinus te videre, et os ad os loquemur. Pax tibi. Salutant te amici. Saluta amicos nominatim.

¹⁵