Deuteronomium 25 Comparatio: Vulgate vs Clementine Vulgate

Deuteronomium 25

¹si fuerit causa inter aliquos et interpellaverint iudices quem iustum esse perspexerint illi iustitiae palmam dabunt quem impium condemnabunt impietatis

²sin autem eum qui peccavit dignum viderint plagis prosternent et coram se facient verberari pro mensura peccati erit et plagarum modus

³ita dumtaxat ut quadragenarium numerum non excedant ne foede laceratus ante oculos tuos abeat frater tuus

⁴non ligabis os bovis terentis in area fruges tuas

⁵quando habitaverint fratres simul et unus ex eis absque liberis mortuus fuerit uxor defuncti non nubet alteri sed accipiet eam frater eius et suscitabit semen fratris sui

⁶et primogenitum ex ea filium nomine illius appellabit ut non deleatur nomen eius ex Israhel

⁷sin autem noluerit accipere uxorem fratris sui quae ei lege debetur perget mulier ad portam civitatis et interpellabit maiores natu dicetque non vult frater viri mei suscitare nomen fratris sui in Israhel nec me in coniugium sumere

⁸statimque accersiri eum facient et interrogabunt si responderit nolo eam uxorem accipere

⁹accedet mulier ad eum coram senioribus et tollet calciamentum de pede eius spuetque in faciem illius et dicet sic fit homini qui non aedificat domum fratris sui

¹⁰et vocabitur nomen illius in Israhel domus Disculciati

¹¹si habuerint inter se iurgium viri et unus contra alterum rixari coeperit volensque uxor alterius eruere virum suum de manu fortioris miserit manum et adprehenderit verenda eius

¹²abscides manum illius nec flecteris super eam ulla misericordia

¹³non habebis in sacculo diversa pondera maius et minus

¹⁴nec erit in domo tua modius maior et minor

¹⁵pondus habebis iustum et verum et modius aequalis et verus erit tibi ut multo vivas tempore super terram quam Dominus Deus tuus dederit tibi

¹⁶abominatur enim Dominus eum qui facit haec et aversatur omnem iniustitiam

¹⁷memento quae fecerit tibi Amalech in via quando egrediebaris ex Aegypto

¹⁸quomodo occurrerit tibi et extremos agminis tui qui lassi residebant ceciderit quando tu eras fame et labore confectus et non timuerit Deum

¹⁹cum ergo Dominus Deus tuus dederit tibi requiem et subiecerit cunctas per circuitum nationes in terra quam tibi pollicitus est delebis nomen eius sub caelo cave ne obliviscaris

Deuteronomium 25

¹Si fuerit causa inter aliquos, et interpellaverint judices : quem justum esse perspexerint, illi justitiæ palmam dabunt : quem impium, condemnabunt impietatis.

²Sin autem eum, qui peccavit, dignum viderint plagis : prosternent, et coram se facient verberari. Pro mensura peccati erit et plagarum modus :

³ita dumtaxat, ut quadragenarium numerum non excedant : ne fœde laceratus ante oculos tuos abeat frater tuus.

⁴Non ligabis os bovis terentis in area fruges tuas.

⁵Quando habitaverint fratres simul, et unus ex eis absque liberis mortuus fuerit, uxor defuncti non nubet alteri : sed accipiet eam frater ejus, et suscitabit semen fratris sui :

⁶et primogenitum ex ea filium nomine illius appellabit, ut non deleatur nomen ejus ex Israël.

⁷Sin autem noluerit accipere uxorem fratris sui, quæ ei lege debetur, perget mulier ad portam civitatis, et interpellabit majores natu, dicetque : Non vult frater viri mei suscitare nomen fratris sui in Israël, nec me in conjugem sumere.

⁸Statimque accersiri eum facient, et interrogabunt. Si responderit : Nolo eam uxorem accipere :

⁹accedet mulier ad eum coram senioribus, et tollet calceamentum de pede ejus, spuetque in faciem illius, et dicet : Sic fiet homini, qui non ædificat domum fratris sui.

¹⁰Et vocabitur nomen illius in Israël, Domus discalceati.

¹¹Si habuerint inter se jurgium viri duo, et unus contra alterum rixari cœperit, volensque uxor alterius eruere virum suum de manu fortioris, miseritque manum, et apprehenderit verenda ejus :

¹²abscides manum illius, nec flecteris super eam ulla misericordia.

¹³Non habebis in sacculo diversa pondera, majus et minus :

¹⁴nec erit in domo tua modius major, et minor.

¹⁵Pondus habebis justum et verum, et modius æqualis et verus erit tibi : ut multo vivas tempore super terram, quam Dominus Deus tuus dederit tibi.

¹⁶Abominatur enim Dominus tuus eum qui facit hæc, et aversatur omnem injustitiam.

¹⁷Memento quæ fecerit tibi Amalec in via quando egrediebaris ex Ægypto :

¹⁸quomodo occurrerit tibi, et extremos agminis tui, qui lassi residebant, ceciderit, quando tu eras fame et labore confectus : et non timuerit Deum.

¹⁹Cum ergo Dominus Deus tuus dederit tibi requiem, et subjecerit cunctas per circuitum nationes in terra, quam tibi pollicitus est : delebis nomen ejus sub cælo. Cave ne obliviscaris.