Baruch 6

¹exemplum epistulae quam misit Hieremias ad abductos captivos in Babyloniam a rege Babyloniorum ut nuntiaret illis secundum quod praeceptum est illi a Deo propter peccata quae peccastis ante Deum abducemini in Babyloniam captivi a Nabuchodonosor rege Babylonum

²ingressi itaque in Babyloniam eritis illic annis plurimis et tempus longum usque ad generationes septem post hoc autem educam vos inde cum pace

³nunc autem videbitis in Babylonia deos aureos et argenteos et lapideos et ligneos in umeros portari ostentantes metum gentibus

⁴videte ergo ne et vos similes efficiamini factis alienis et metuatis et metus vos capiat in ipsis

⁵visa itaque turba de retro et ab ante adorantes dicite in cordibus vestris tibi oportet adorari Domine

⁶angelus autem meus vobiscum est ipse autem exquiram animas vestras

⁷nam lingua ipsorum polita a fabro ipsa etiam inaurata et inargentata falsa sunt et non possunt loqui

⁸et sicut virgini amanti ornamenti ita accepto auro fabricati sunt

⁹coronas certe habent aureas super capita sua dii illorum unde subtrahent sacerdotes ab eis aurum et argentum et erogant illud in semet ipsis

¹⁰dant autem et ex ipso prostitutis et meretrices ornant et iterum cum receperint illud a meretricibus ornant deos suos

¹¹hii autem non liberantur ab erugine et tinea

¹²opertis autem illis veste purpurea extergent faciem ipsorum propter pulverem domus qui est plurimus inter eos

¹³sceptrum autem habet ut homo sicut iudex regionis qui in se peccantem non interficit

¹⁴habet etiam gladium in manu et securem se autem de bello et a latronibus non liberat unde vobis notum sit quia non sunt dii

¹⁵ne ergo timueritis eos sicut enim vas hominis confractum inutile efficitur tales sunt et dii illorum

¹⁶constitutis illis in domo oculi eorum pleni sunt pulvere a pedibus introeuntium

¹⁷et sicut alicui qui regem offendit circumseptae sunt ianuae aut sicut ad sepulchrum adductum mortuum ita tutant sacerdotes ostia clusuris et seris ne a latronibus expolientur

¹⁸lucernas accendunt illis et quidem multas ex quibus nullam videre possunt sunt autem sicut trabes in domo

¹⁹corda vero eorum dicunt elingere serpentes qui de terra sunt dum comedent eos et vestimentum ipsorum et non sentiunt

²⁰nigrae fiunt facies eorum a fumo qui in domo fit

²¹supra corpus eorum et supra caput volant noctuae et hirundines et aves etiam similiter et cattae

²²unde scietis quia non sunt dii ne ergo timueritis eos

²³aurum etiam quod habent ad speciem est nisi aliquis exterserit eruginem non fulgebunt neque enim dum conflarentur sentiebant

²⁴ex omni pretio empta sunt in quibus spiritus non est in ipsis

²⁵sine pedibus in umeris portantur ostentantes ignobilitatem suam hominibus confundantur etiam qui colunt ea

²⁶propterea si ceciderint in terram a semet ipsis non surgent neque si quis eum statuerit rectum per semet ipsum stabit sed sicut mortuis munera eorum illis adponentur

²⁷hostias illorum sacerdotes ipsorum vendunt et abutuntur similiter et mulieres eorum decerpentes neque infirmo neque mendicanti aliquid inpertiunt

²⁸de sacrificiis eorum fetae et menstruatae contingunt scientes itaque ex his quia non sunt dii ne timeatis eos

²⁹unde enim vocantur dii quia mulieres adponunt diis argenteis et aureis et ligneis

³⁰et in domibus eorum sacerdotes sedent habentes tunicas scissas et capita et barbas rasa quorum capita nuda sunt

³¹rugiunt autem clamantes contra deos suos sicut in cena mortui

³²a vestimento eorum auferent sacerdotes et vestiunt uxores suas et filios suos

³³neque si quid mali patiantur ab aliquo neque si quid bonum poterunt retribuere neque regem constituere possunt neque auferre

³⁴similiter neque divitias dare possunt neque malum retribuere si quis illis votum voverit et non reddiderit nec hoc requirent

³⁵hominem a morte non liberant neque infimum a potentiore eripient

³⁶hominem caecum ad visum non restituent de necessitate hominem non liberabunt

³⁷viduae non miserebuntur neque orfanis benefacient

³⁸lapidibus de monte similes sunt dii illorum lignei et lapidei aurei et argentei qui autem colunt illa confundentur

³⁹quomodo ergo aestimandum est aut dicendum illos esse deos

⁴⁰adhuc enim ipsis Chaldeis non honorantibus ea qui cum audierint mutum non posse loqui offerent illum ad Bel postulantes ab eo loqui

⁴¹quasi possint sentire qui non habent motum et ipsi cum intellexerint relinquent ea sensum enim non habent ipsi dii illorum

⁴²mulieres autem circumdatis funibus in viis sedent succendentes ossa olivarum

⁴³cum autem aliqua ex ipsis adtracta ab aliquo transeunte dormierit proximae suae exprobrat quod ea non sit digna habita sicut ipsa neque funis eius disruptus sit

⁴⁴omnia autem quae illis fiunt falsa sunt quomodo ergo aestimandum aut dicendum est esse illos deos

⁴⁵a fabris autem et ab aurificibus facta sunt nihil aliud erint nisi id quod volunt esse sacerdotes

⁴⁶aurifices ipsi etiam qui ea faciunt non sunt multi temporis numquid ergo possunt quae ab ipsis fabricata sunt esse dii

⁴⁷reliquerunt autem falsa et obprobrium postea futuris

⁴⁸nam cum supervenerit illis proelium et mala cogitant post se sacerdotes ubi se abscondant cum illis

⁴⁹quomodo ergo sentiri debeant quoniam dii sunt qui nec de bello se liberant neque de malis se eripiunt

⁵⁰nam cum sint lignea et inaurata et inargentata scietur postea quia falsa sunt gentibus universis et regibus quae manifestata sunt quia non sunt dii sed opera manuum hominum et nullum opus Dei in illis

⁵¹unde ergo notum est quia non sunt dii sed opera manuum hominum et nullum Dei opus in ipsis est

⁵²regem regioni non suscitant neque pluviam hominibus dabunt

⁵³iudicium quoque non discernent neque regionem liberabunt ab iniuria quia nihil possunt sicut corniculae inter medium caeli et terrae

⁵⁴etenim cum inciderit ignis in domum deorum ligneorum aureorum et argenteorum sacerdotes quidem ipsorum fugient et liberabuntur ipsi vero sicut trabes in medio conburentur

⁵⁵regi autem et bello non resistent quomodo ergo aestimandum est aut recipiendum quia dii sunt

⁵⁶non a furibus neque a latronibus se liberabunt dii lignei et lapidei et inaurati et argentati quibus hii qui fortiores sunt

⁵⁷aurum et argentum et vestimentum quod operti sunt auferent illis et abibunt nec sibi auxilium ferunt

⁵⁸itaque melius est esse regem ostentantem virtutem suam aut vas in domo utile in quo gloriabitur qui possidet illud quam falsi dii vel ostium in domo quod custodit quae in ipsa sunt quam falsi dii

⁵⁹sol quidem et luna sidera cum sint splendida et emissa ad utilitates obaudiunt

⁶⁰similiter et fulgur cum apparuerit perspicuum est id ipsum autem et spiritus in omni regione spirat

⁶¹et nubes quibus cum imperatum fuerit a Deo perambulare universum orbem perficiunt quod imperatum est eis

⁶²ignis etiam missus desuper ut consumat montes et silvas facit quod praeceptum est ei haec autem neque speciebus neque virtutibus uni eorum similia sunt

⁶³unde neque aestimandum est neque dicendum esse illos deos quando non possint neque iudicium iudicare neque benefacere hominibus

⁶⁴scientes itaque quia non sunt dii ne ergo timueritis eos

⁶⁵neque enim regibus maledicent neque benedicent

⁶⁶signa etiam in caelo gentibus non ostendunt neque ut sol lucebunt neque inluminabunt ut luna

⁶⁷bestiae meliores sunt illis quae possunt fugere sub tectum ac prodesse sibi

⁶⁸nullo itaque modo nobis est manifestum quia sunt dii propter quod ne timeatis eos

⁶⁹nam sicut in cucumeraria formido nihil custodit ita sunt dii illorum lignei et argentei et inaurati

⁷⁰eodem modo et in horto spina alba supra quam omnis avis sedet similiter et mortuo proiecto in tenebris similes sunt dii illorum lignei et inaurati et inargentati

⁷¹a purpura quoque et marmore quae supra illos tineant scietis itaque quia non sunt dii ipsi etiam postremo comeduntur et erit obprobrium in regione

⁷²melior est homo iustus qui non habet simulacra nam erit longe ab obprobriis

Baruch 6

¹Propter peccata quæ peccastis ante Deum, abducemini in Babyloniam captivi a Nabuchodonosor rege Babylonis.

²Ingressi itaque in Babylonem, eritis ibi annis plurimis, et temporibus longis, usque ad generationes septem : post hoc autem educam vos inde cum pace.

³Nunc autem videbitis in Babylonia deos aureos et argenteos, et lapideos et ligneos, in humeris portari, ostentantes metum gentibus.

⁴Videte ergo ne et vos similes efficiamini factis alienis, et metuatis, et metus vos capiat in ipsis.

⁵Visa itaque turba de retro et ab ante, adorantes dicite in cordibus vestris : Te oportet adorari, Domine.

⁶Angelus enim meus vobiscum est : ipse autem exquiram animas vestras.

⁷Nam lingua ipsorum polita a fabro ; ipsa etiam inaurata et inargentata : falsa sunt, et non possunt loqui.

⁸Et sicut virgini amanti ornamenta, ita accepto auro fabricati sunt.

⁹Coronas certe aureas habent super capita sua dii illorum : unde subtrahunt sacerdotes ab eis aurum et argentum, et erogant illud in semetipsos.

¹⁰Dant autem et ex ipso prostitutis, et meretrices ornant : et iterum cum receperint illud a meretricibus, ornant deos suos.

¹¹Hi autem non liberantur ab ærugine et tinea.

¹²Opertis autem illis veste purpurea, extergunt faciem ipsorum propter pulverem domus qui est plurimus inter eos.

¹³Sceptrum autem habet ut homo, sicut judex regionis, qui in se peccantem non interficit.

¹⁴Habet etiam in manu gladium et securim, se autem de bello et a latronibus non liberat. Unde vobis notum sit quia non sunt dii :

¹⁵non ergo timueritis eos. Sicut enim vas hominis confractum inutile efficitur, tales sunt et dii illorum.

¹⁶Constitutis illis in domo, oculi eorum pleni sunt pulvere a pedibus introëuntium.

¹⁷Et sicut alicui qui regem offendit circumseptæ sunt januæ, aut sicut ad sepulchrum adductum mortuum : ita tutantur sacerdotes ostia clausuris et seris, ne a latronibus expolientur.

¹⁸Lucernas accendunt illis, et quidem multas, ex quibus nullam videre possunt : sunt autem sicut trabes in domo.

¹⁹Corda vero eorum dicunt elingere serpentes qui de terra sunt, dum comedunt eos, et vestimentum ipsorum, et non sentiunt.

²⁰Nigræ fiunt facies eorum a fumo qui in domo fit.

²¹Supra corpus eorum et supra caput eorum volant noctuæ, et hirundines, et aves etiam, similiter et cattæ.

²²Unde sciatis quia non sunt dii : ne ergo timueritis eos.

²³Aurum etiam quod habent ad speciem est : nisi aliquis exterserit æruginem, non fulgebunt : neque enim dum conflarentur, sentiebant.

²⁴Ex omni pretio empta sunt, in quibus spiritus non inest ipsis.

²⁵Sine pedibus, in humeris portantur, ostentantes ignobilitatem suam hominibus : confundantur etiam qui colunt ea.

²⁶Propterea si ceciderint in terram, a semetipsis non consurgunt : neque si quis eum statuerit rectum, per semetipsum stabit : sed sicut mortuis munera eorum illis apponentur.

²⁷Hostias illorum vendunt sacerdotes ipsorum, et abutuntur : similiter et mulieres eorum decerpentes, neque infirmo, neque mendicanti, aliquid impertiunt.

²⁸De sacrificiis eorum fœtæ et menstruatæ contingunt. Sciens itaque ex his quia non sunt dii, ne timeatis eos.

²⁹Unde enim vocantur dii ? quia mulieres apponunt diis argenteis, et aureis, et ligneis :

³⁰et in domibus eorum sacerdotes sedent habentes tunicas scissas, et capita et barbam rasam, quorum capita nuda sunt.

³¹Rugiunt autem clamantes contra deos suos sicut in cœna mortui.

³²Vestimenta eorum auferunt sacerdotes, et vestiunt uxores suas et filios suos.

³³Neque si quid mali patiuntur ab aliquo, neque si quid boni, poterunt retribuere : neque regem constituere possunt, neque auferre.

³⁴Similiter neque dare divitias possunt, neque malum retribuere. Si quis illis votum voverit et non reddiderit, neque hoc requirunt.

³⁵Hominem a morte non liberant, neque infirmum a potentiori eripiunt.

³⁶Hominem cæcum ad visum non restituunt ; de necessitate hominem non liberabunt.

³⁷Viduæ non miserebuntur, neque orphanis benefacient.

³⁸Lapidibus de monte similes sunt dii illorum, lignei, et lapidei, et aurei, et argentei : qui autem colunt ea, confundentur.

³⁹Quomodo ergo æstimandum est aut dicendum illos esse deos ?

⁴⁰Adhuc enim ipsis Chaldæis non honorantibus ea : qui cum audierint mutum non posse loqui, offerunt illud ad Bel, postulantes ab eo loqui :

⁴¹quasi possint sentire qui non habent motum ! Et ipsi, cum intellexerint, relinquent ea : sensum enim non habent ipsi dii illorum.

⁴²Mulieres autem circumdatæ funibus in viis sedent, succendentes ossa olivarum :

⁴³cum autem aliqua ex ipsis, attracta ab aliquo transeunte, dormierit cum eo, proximæ suæ exprobrat quod ea non sit digna habita, sicut ipsa, neque funis ejus diruptus sit.

⁴⁴Omnia autem quæ illi fiunt, falsa sunt : quomodo æstimandum aut dicendum est illos esse deos ?

⁴⁵A fabris autem et ab aurificibus facta sunt : nihil aliud erunt, nisi id quod volunt esse sacerdotes.

⁴⁶Artifices etiam ipsi, qui ea faciunt, non sunt multi temporis : numquid ergo possunt ea, quæ fabricata sunt ab ipsis, esse dii ?

⁴⁷Reliquerunt autem falsa et opprobrium postea futuris.

⁴⁸Nam cum supervenerit illis prælium et mala, cogitant sacerdotes apud se ubi se abscondant cum illis.

⁴⁹Quomodo ergo sentiri debeant quoniam dii sunt, qui nec de bello se liberant, neque de malis se eripiunt ?

⁵⁰Nam cum sint lignea, inaurata et inargentata, scietur postea quia falsa sunt ab universis gentibus et regibus : quæ manifesta sunt quia non sunt dii, sed opera manuum hominum, et nullum Dei opus cum illis.

⁵¹Unde ergo notum est quia non sunt dii, sed opera manuum hominum, et nullum Dei opus in ipsis est.

⁵²Regem regioni non suscitant, neque pluviam hominibus dabunt.

⁵³Judicium quoque non discernent, neque regiones liberabunt ab injuria, quia nihil possunt, sicut corniculæ inter medium cæli et terræ.

⁵⁴Etenim cum inciderit ignis in domum deorum ligneorum, argenteorum et aureorum, sacerdotes quidem ipsorum fugient, et liberabuntur : ipsi vero sicut trabes in medio comburentur.

⁵⁵Regi autem et bello non resistent. Quomodo ergo æstimandum est aut recipiendum quia dii sunt ?

⁵⁶Non a furibus, neque a latronibus se liberabunt dii lignei, et lapidei, et inaurati, et inargentati : quibus hi qui fortiores sunt,

⁵⁷aurum et argentum, et vestimentum quo operti sunt, auferent illis, et abibunt, nec sibi auxilium ferent.

⁵⁸Itaque melius est esse regem ostentantem virtutem suam, aut vas in domo utile, in quo gloriabitur qui possidet illud, vel ostium in domo, quod custodit quæ in ipsa sunt, quam falsi dii.

⁵⁹Sol quidem et luna ac sidera, cum sint splendida et emissa ad utilitates, obaudiunt :

⁶⁰similiter et fulgur cum apparuerit, perspicuum est : idipsum autem et spiritus in omni regione spirat :

⁶¹et nubes, quibus cum imperatum fuerit a Deo perambulare universum orbem, perficiunt quod imperatum est eis :

⁶²ignis etiam missus desuper, ut consumat montes et silvas, facit quod præceptum est ei : hæc autem neque speciebus, neque virtutibus, uni eorum similia sunt.

⁶³Unde neque existimandum est, neque dicendum illos esse deos, quando non possunt neque judicium judicare, neque quidquam facere hominibus.

⁶⁴Scientes itaque quia non sunt dii, ne ergo timueritis eos.

⁶⁵Neque enim regibus maledicent, neque benedicent.

⁶⁶Signa etiam in cælo gentibus non ostendunt : neque ut sol lucebunt, neque illuminabunt ut luna.

⁶⁷Bestiæ meliores sunt illis, quæ possunt fugere sub tectum ac prodesse sibi.

⁶⁸Nullo itaque modo nobis est manifestum quia sunt dii : propter quod ne timeatis eos.

⁶⁹Nam sicut in cucumerario formido nihil custodit, ita sunt dii illorum lignei, et argentei, et inaurati.

⁷⁰Eodem modo et in horto spina alba, supra quam omnis avis sedet, similiter et mortuo projecto in tenebris, similes sunt dii illorum lignei, et inaurati, et inargentati.

⁷¹A purpura quoque et murice, quæ supra illos tineant, scietis itaque quia non sunt dii : ipsi etiam postremo comeduntur, et erunt opprobrium in regione.

⁷²Melior est homo justus qui non habet simulacra, nam erit longe ab opprobriis.