Apocalypsis 22

¹et ostendit mihi fluvium aquae vitae splendidum tamquam cristallum procedentem de sede Dei et agni

²in medio plateae eius et ex utraque parte fluminis lignum vitae adferens fructus duodecim per menses singula reddentia fructum suum et folia ligni ad sanitatem gentium

³et omne maledictum non erit amplius et sedes Dei et agni in illa erunt et servi eius servient illi

⁴et videbunt faciem eius et nomen eius in frontibus eorum

⁵et nox ultra non erit et non egebunt lumine lucernae neque lumine solis quoniam Dominus Deus inluminat illos et regnabunt in saecula saeculorum

⁶et dixit mihi haec verba fidelissima et vera sunt et Dominus Deus spirituum prophetarum misit angelum suum ostendere servis suis quae oportet fieri cito

⁷et ecce venio velociter beatus qui custodit verba prophetiae libri huius

⁸et ego Iohannes qui audivi et vidi haec et postquam audissem et vidissem cecidi ut adorarem ante pedes angeli qui mihi haec ostendebat

⁹et dicit mihi vide ne feceris conservus tuus sum et fratrum tuorum prophetarum et eorum qui servant verba libri huius Deum adora

¹⁰et dicit mihi ne signaveris verba prophetiae libri huius tempus enim prope est

¹¹qui nocet noceat adhuc et qui in sordibus est sordescat adhuc et iustus iustitiam faciat adhuc et sanctus sanctificetur adhuc

¹²ecce venio cito et merces mea mecum est reddere unicuique secundum opera sua

¹³ego Alpha et Omega primus et novissimus principium et finis

¹⁴beati qui lavant stolas suas ut sit potestas eorum in ligno vitae et portis intrent in civitatem

¹⁵foris canes et venefici et inpudici et homicidae et idolis servientes et omnis qui amat et facit mendacium

¹⁶ego Iesus misi angelum meum testificari vobis haec in ecclesiis ego sum radix et genus David stella splendida et matutina

¹⁷et Spiritus et sponsa dicunt veni et qui audit dicat veni et qui sitit veniat qui vult accipiat aquam vitae gratis

¹⁸contestor ego omni audienti verba prophetiae libri huius si quis adposuerit ad haec adponet Deus super illum plagas scriptas in libro isto

¹⁹et si quis deminuerit de verbis libri prophetiae huius auferet Deus partem eius de ligno vitae et de civitate sancta et de his quae scripta sunt in libro isto

²⁰dicit qui testimonium perhibet istorum etiam venio cito amen veni Domine Iesu

²¹gratia Domini nostri Iesu Christi cum omnibus

Apocalypsis 22

¹Et ostendit mihi fluvium aquæ vitæ, splendidum tamquam crystallum, procedentem de sede Dei et Agni.

²In medio plateæ ejus, et ex utraque parte fluminis, lignum vitæ, afferens fructus duodecim per menses singulos, reddens fructum suum et folia ligni ad sanitatem gentium.

³Et omne maledictum non erit amplius : sed sedes Dei et Agni in illa erunt, et servi ejus servient illi.

⁴Et videbunt faciem ejus : et nomen ejus in frontibus eorum.

⁵Et nox ultra non erit : et non egebunt lumine lucernæ, neque lumine solis, quoniam Dominus Deus illuminabit illos, et regnabunt in sæcula sæculorum.

⁶Et dixit mihi : Hæc verba fidelissima sunt, et vera. Et Dominus Deus spirituum prophetarum misit angelum suum ostendere servis suis quæ oportet fieri cito.

⁷Et ecce venio velociter. Beatus, qui custodit verba prophetiæ libri hujus.

⁸Et ego Joannes, qui audivi, et vidi hæc. Et postquam audissem, et vidissem, cecidi ut adorarem ante pedes angeli, qui mihi hæc ostendebat :

⁹et dixit mihi : Vide ne feceris : conservus enim tuus sum, et fratrum tuorum prophetarum, et eorum qui servant verba prophetiæ libri hujus : Deum adora.

¹⁰Et dicit mihi : Ne signaveris verba prophetiæ libri hujus : tempus enim prope est.

¹¹Qui nocet, noceat adhuc : et qui in sordibus est, sordescat adhuc : et qui justus est, justificetur adhuc : et sanctus, sanctificetur adhuc.

¹²Ecce venio cito, et merces mea mecum est, reddere unicuique secundum opera sua.

¹³Ego sum alpha et omega, primus et novissimus, principium et finis.

¹⁴Beati, qui lavant stolas suas in sanguine Agni : ut sit potestas eorum in ligno vitæ, et per portas intrent in civitatem.

¹⁵Foris canes, et venefici, et impudici, et homicidæ, et idolis servientes, et omnis qui amat et facit mendacium.

¹⁶Ego Jesus misi angelum meum testificari vobis hæc in ecclesiis. Ego sum radix, et genus David, stella splendida et matutina.

¹⁷Et spiritus, et sponsa dicunt : Veni. Et qui audit, dicat : Veni. Et qui sitit, veniat : et qui vult, accipiat aquam vitæ, gratis.

¹⁸Contestor enim omni audienti verba prophetiæ libri hujus : si quis apposuerit ad hæc, apponet Deus super illum plagas scriptas in libro isto.

¹⁹Et si quis diminuerit de verbis libri prophetiæ hujus, auferet Deus partem ejus de libro vitæ, et de civitate sancta, et de his quæ scripta sunt in libro isto :

²⁰dicit qui testimonium perhibet istorum. Etiam venio cito : amen. Veni, Domine Jesu.

²¹Gratia Domini nostri Jesu Christi cum omnibus vobis. Amen.