1דברי ירמיהו בן חלקיהו מן הכהנים אשר בענתות בארץ בנימן׃stylus···2אשר היה דבר יהוה אליו בימי יאשיהו בן אמון מלך יהודה בשלש עשרה שנה למלכו׃stylus···3ויהי בימי יהויקים בן יאשיהו מלך יהודה עד תם עשתי עשרה שנה לצדקיהו בן יאשיהו מלך יהודה עד גלות ירושלם בחדש החמישי׃stylus···4ויהי דבר יהוה אלי לאמר׃stylus···5בטרם אצורך בבטן ידעתיך ובטרם תצא מרחם הקדשתיך נביא לגוים נתתיך׃stylus···6ואמר אהה אדני יהוה הנה לא ידעתי דבר כי נער אנכי׃stylus···7ויאמר יהוה אלי אל תאמר נער אנכי כי על כל אשר אשלחך תלך ואת כל אשר אצוך תדבר׃stylus···8אל תירא מפניהם כי אתך אני להצלך נאם יהוה׃stylus···9וישלח יהוה את ידו ויגע על פי ויאמר יהוה אלי הנה נתתי דברי בפיך׃stylus···10ראה הפקדתיך היום הזה על הגוים ועל הממלכות לנתוש ולנתוץ ולהאביד ולהרוס לבנות ולנטוע׃stylus···11ויהי דבר יהוה אלי לאמר מה אתה ראה ירמיהו ואמר מקל שקד אני ראה׃stylus···12ויאמר יהוה אלי היטבת לראות כי שקד אני על דברי לעשתו׃stylus···13ויהי דבר יהוה אלי שנית לאמר מה אתה ראה ואמר סיר נפוח אני ראה ופניו מפני צפונה׃stylus···14ויאמר יהוה אלי מצפון תפתח הרעה על כל ישבי הארץ׃stylus···15כי הנני קרא לכל משפחות ממלכות צפונה נאם יהוה ובאו ונתנו איש כסאו פתח שערי ירושלם ועל כל חומתיה סביב ועל כל ערי יהודה׃stylus···16ודברתי משפטי אותם על כל רעתם אשר עזבוני ויקטרו לאלהים אחרים וישתחוו למעשי ידיהם׃stylus···17ואתה תאזר מתניך וקמת ודברת אליהם את כל אשר אנכי אצוך אל תחת מפניהם פן אחתך לפניהם׃stylus···18ואני הנה נתתיך היום לעיר מבצר ולעמוד ברזל ולחמות נחשת על כל הארץ למלכי יהודה לשריה לכהניה ולעם הארץ׃stylus···19ונלחמו אליך ולא יוכלו לך כי אתך אני נאם יהוה להצילך׃stylus···